Declaración internacionalista en favor d'a paz y a democracia de Kurdistán y Turquía

O 20 de chulio, l'Estau Islamico asesinaba en Suruç (Kurdistán turco) a 32 chovens antifaixistas turcos que marchaban ta Kobanê pa treballar en a suya reconstrucción. A masacre suposaba una enrestida fisica t'a solidaridat internacionalista y una enrestida simbolica a o prochecto de construcción de l'alternativa social, economica y politica revolucionaria que s'empenta en Rojava (Kurdistán sirio).
L'Estau turco, que dica agora i heba tolerau y amás facilitau a presencia de l'Estau Islamico en a suya muga, lanzó alavez a suya primera intervención militar en o conflicto sirio, aproveitando a situación pa enrestir contra la resistencia kurda, a traviés de bombardeos en as montanyas de Kandil (Kurdistán d'Irak) y d'a detención de centenars d'activistas y sindicalistas en as principals ciudatz d'o Kurdistán turco.
Tras o chiro en a estratechia turca, o proceso de negociacions de paz que manteneban dende o 2010 o gubierno y o movimiento de liberación nacional y social kurdo quedaba definitivament crebau y as asperanzas de paz, apedecadas.
Turquía tornaba con a suya estratechia represiva, contimparando publicament, de traza perversa, a o faixismo fundamentalista y ultraconservador de l'Estau Islamico con a luita popular y autoorganizada d'as kurdas y kurdos que barallan en nombre d'a vida, a interculturalidat, l'antifaixismo, a democracia radical y a liberación d'as mullers.
As nuestras companyeras y companyers han estau clamaus terroristas, dimpués d'estar obcheto d'una masacre d'a que o propio Estau turco ha estau complice, permitindo que collas afins a Estau Islamico se reproduzcan y campen librement aintro d'o suyo territorio.
Con a suya actitut profundament autoritaria, propia d'os estaus opresors que, desafortunadament conoixemos bien as organizacions nacionalistas y independentistas de l'Estau espanyol, o gubierno turco amuestra de nuevo o suyo nulo compromís con a paz, dimpués de dos anyadas en que practicament no ha dau garra trango ent'a resolución d'iste conflicto y a democratización de Turquía.
As organizacions firmants queremos refusar a enrestida en Suruç y expresar a nuestra solidaridat y carinyo a familiars y companyeras de luita d'as victimas, asinas como reafirmar o nuestro emparo a qui construyen l'alternativa politica, social y economica en Kurdistán y en Turquía.
D'una man, exichimos a o gubierno turco:

• Que remate d'inmediato l'asedio y a estratechia de represión contra o movimiento de liberación nacional y social kurdo y a o pueblo kurdo en cheneral, asinas como contra as opciones politicas democraticas y de base.
• Que libere d'inmediato a os companyers y companyeras kurdas detenidas.
• Que apueste, d'una vez y firmement, por a paz y a resolución d'iste conflicto, pues a suya postura actual nomás contribuye a chenerar más sufrimiento, más desplazaus y exiliaus y da más hechemonía a qui menaza qualsiquier traza de vida democratica y plural.

D'atra man, exichimos, tamién, a la comunidat internacional que actúe d'inmediato, abandonando a suya clasica estratechia con iste conflicto de mirar pa atro costau, permitindo a vulneración d'os dreitos humanos más alazetals.

Bloque Nacionalista Galego (Galiza)
Candidatura d'Unitat Popular (Països Catalans)
EH Bildu (Euskal Herria),
Puyalón (Aragón)